PM
Vinur vill eyða sumarfríinu með þér. Skrifaðu honum skilaboð þar sem þú tilkynnir honum að það gangi ekki.
Twitter-færsla
Ísland er land án hers. Nú er hins vegar svo komið að ráðandi öfl telja að úr því verði að bæta. Skrifaðu Twitter-færslu (280 slög) í nafni forsetans þar sem fram kemur af hverju Íslendingar verði að koma á herskyldu í landinu.
Örlítil örsaga
Jóna Guðbjörg Torfadóttir, íslenskukennari og ljóðskáld, setti saman örlitla örsögu og birti hana á Facebook-síðu sinni til að skemmta ykkur – eða ekki:
Í útlendri sögu segir frá því að ör hæfði örgeðja mann í lærið og hlaust af því ljótt ör. Ekki örvaðist maðurinn við það heldur örvinglaðist enda varð hann á örskammri örstundu örmagna, örkumla öryrki. Maðurinn var örlyndur en örlögin höguðu því þó þannig að sjálfur bjó hann við mikla örbirgð og svo kom að hann dó örvæntingarfullur, örmæddur og örvasa en örugglega. Og allt út af einni örlítilli ör!
Taktu Jónu til fyrirmyndar og semdu örsögu með því að „ofnota“ eitthvert forskeyti. Í skjalinu má finna dæmi um nokkur forskeyti.
Handa Auði
Hugsaðu til manneskju sem þér líkar vel við. Skrifaðu ljóð sem inniheldur tólf línur þar sem þú lýsir viðkomandi með því að nota líkingamál. Hér eru leiðbeiningar:
- Fyrsta lína: Líktu manneskjunni við mat.
- Önnur lína: Líktu henni við veður.
- Þriðja lína: Líktu henni við tré.
- Fjórða lína: Líktu henni við tíma dags.
- Fimmta lína: Líktu henni við farartæki.
- Sjötta lína: Líktu henni við flík.
- Sjöunda lína: Líktu henni við stað á heimili.
- Áttunda lína: Líktu henni við blóm.
- Níunda lína: Líktu henni við tónlist eða hljóð.
- Tíunda lína: Líktu henni við eitthvað sem tengist lit eða litum.
- Ellefta lína: Líktu henni við dýr.
- Tólfta lína: Lokalína að eigin vali – einhvers konar niðurstaða.
Tré ársins
Prófaðu að yrkja ljóð um tré ársins. Hverju hefur það orðið vitni að?