Orðalag |
Hér fara á eftir sex spurningar. Umorðaðu þær þannig að lesandinn fái vísbendingar um persónuna sem talar. Reyndu að koma með þrjár til fimm tillögur að hverri spurningu.
- Geturðu hjálpað mér að finna bíllyklana?
- Hvað er klukkan?
- Viltu bera kassann með mér?
- Viltu eitthvað að borða?
- Geturðu lánað mér 500 krónur?
- Er þetta sæti laust?
Orðalag |
Veldu eitt af eftirfarandi fyrirbærum til að lýsa og gerðu tilraunir með orðalagið.
- Vonskuveður
- Hellir
- Brú
- Foss
- Sólarlag
- Tré
- Lýstu fyrirbærinu með því að nota löng orð og langar setningar eða málsgreinar. Leitastu við að nota orð sem eru fleiri en eitt atkvæði.
- Skrifaðu lýsinguna með því að nota stutt orð og knappar setningar og málsgreinar.
- Ímyndaðu þér að þú sért að útskýra fyrirbærið fyrir einhverjum sem hefur aldrei séð það áður.
- Skrifaðu auglýsingatexta um fyrirbærið.
Samtöl |
Hér að neðan eru hugmyndir að símtölum. Veldu eina og skrifaðu samtal. Biddu svo einhvern að lesa það upphátt með þér. Þá heyrir þú strax hvort samtalið er eðlilegt.
Mundu að hafa greinaskil í hvert skipti sem „hinn“ tekur til máls. Öll greinarmerki eiga að vera innan gæsalappanna: „Svona.“
- Síminn hringir og persónan ansar. Á hinni línunni er einhver sem tilkynnir persónunni að maki hennar hafi verið henni ótrúr. Persónan þekkir ekki rödd þess sem hringir.
- Þú hefur unnið 100 milljónir í happdrætti. Í hvern hringir þú? Hvað myndirðu segja?
- Síminn hringir. Kunnugleg rödd úr fortíðinni heyrist úr tólinu. Hver er að hringja? Af hverju?
- Persónan tekur upp tólið til að hringja en fær ekki són heldur heyrir hún einhvern hrópa á hjálp.
- Persónan er stödd á kaffihúsi þegar starfsmaður segir henni að það sé síminn til hennar. Þegar hún ansar segir einhver: „Ég fylgist með þér…“
- Góður vinur hringir í þig og segist vilja slíta vinskapnum.
Samtöl |
Skrifaðu 300 orða samtal á milli tveggja persóna. Efnisgreinarnar eiga byrja á Hún sagði: „________“ og Hann sagði: „________“ til skiptis.
