Ljóð – ævintýri
Allir skrifa 5 stakar setningar sem tengjast „Rauðhettu“. Þær þurfa ekki að vera í samhengi. Hver og einn velur eina úr. Kennari tekur við þeim (ein lína frá hverjum nemanda) og raðar saman. Úr verður ljóð.
Nautið mígur
Rifjaðu upp ævintýri sem þú þekkir vel. Ef þér dettur ekkert í hug getur þú valið eitthvert af þeim sem finna má á Snerpu.[1] Í slíkum sögum er sjaldnast dvalið við smáatriði. Taktu fyrir einn atburð í sögunni og lýstu nánar. Ef „Búkolla“ yrði fyrir valinu gætir þú t.d. lýst því nánar þegar bóndasonurinn verður var við skessurnar eða þegar nautið mígur til að slökkva bálið.
Með augum annarra
Skrifaðu eina efnisgrein um líðan þína þessa stundina.
Ímyndaðu þér að einhver standi fyrir utan og horfi á þig inn um glugga. Skrifaðu eina efnisgrein í þriðju persónu þar sem þér er lýst með augum þess sem er fyrir utan.
Öldungur
Hver er elsta manneskja sem þú hefur hitt? Segðu frá henni í nokkrum orðum.
Starfsmaður á plani
Við hittum fólk í þjónustustörfum nánast á hverjum degi.
- Hugsaðu um einhvern sem þú hefur átt samskipti við nýlega, t.d. starfsmann í verslun, bifvélavirkja eða leigubílstjóra.
- Punktaðu hjá þér öll smáatriði sem koma upp í hugann. „Life is in the details, and so is good fiction.“ Hér þarf að varast staðalímyndir. Reyndu að gleyma öllum fyrirframgefnum hugmyndum sem þú hefur um fólkið sem um ræðir.