Orðalag |
heitir bók sem kom út árið 2017 eftir Símon Jón Jóhannsson. Í bókinni er fjallað um fjölmörg tákn og fyrirboða sem birtast okkur í daglegu lífi.
Hvað táknar appelsínugulur litur? Hverju geta menn átt von á ef þeir klippa neglurnar á föstudegi? Hvaða dagar eru heppilegir til brúðkaupa? Af hverju er vissara að forðast að gefa veiku fólki hvít blóm? Hvaða merkingu hefur talan níu? Hvenær í vikunni er heppilegast að þvo þvott? Hvað gerist ef menn horfa lengi inn í örbylgjuofn?((Símon Jón Jóhannsson. (2017). Fyrirboðar og tákn: Auðnuspor og ólánsvegir í daglegu lífi. Reykjavík: Veröld.))
Blaðaðu í bókinni og skrifaðu sögu sem hverfist um eitthvert tákn eða hjátrú sem fjallað er um í henni.
Form |
Punktaðu hjá þér fimm til tíu orð sem koma upp í hugann. Veldu eitt af þessum orðum sem þú telur að geti kveikt hugmynd að sögu. Skrifaðu í framhaldinu önnur fimm orð eða setningar sem þér hugkvæmist og tengjast orðinu sem þú valdir. Notaðu þetta hugarkort til að skrifa ágrip af smásögu.
Form |
Stilltu þér upp fyrir framan bókahillu, lokaðu augunum, taktu eina bók úr hillunni og flettu nokkurn veginn inn að miðju. Nú skaltu finna eina málsgrein á síðunni og skrifa hana hjá þér. Notaðu þessa málsgrein í örsögu.
Stutt |
Skrifaðu fimm spurningar sem hefjast á orðunum hvað ef… Hér reynir á ímyndunaraflið því spurningarnar eiga að snúast um eitthvað sem þér finnst óhugsandi eða í besta falli fáránlegt.
Orðalag |
Veldu tilvitnun eða spakmæli sem höfðar til þín. Ef ekkert kemur upp í hugann má styðjast við bækur líkt og Tilvitnanabókina eftir Kolbrúnu Bergþórsdóttur eða app eins og Orð í tíma töluð. Svo má finna ógrynni spakmæla á netinu. Skrifaðu stutta sögu með ákveðna tilvitnun í huga án þess að hún komi beinlínis fram í textanum.
