Hafðu tvo hluti meðferðis í næsta tíma. Þeir eiga hvor um sig að geta rúmast í lófanum á þér.
Öllum hlutunum verður safnað saman í poka og svo á hver og einn að draga tvo hluti úr honum. Ef þú dregur hlutinn þinn þarftu að skila honum og draga aftur.
Skrifaðu stutta sögu um það sem kemur upp í hugann við að handfjatla þessa hluti.
Hafðu augun opin þegar þú ert á ferðinni. Hlutur sem þú sérð á víðavangi eða á búðarölti gæti orðið gersemi ef hann kveikir hugmynd að sögu (t.d. líkkista í Góða hirðinum, ljósmynd á handriði í stigagangi, sokkur á öxlinni á styttu…).
Sjón sagði einhvern tímann:
Ég hef notað drauma sem efni í ljóð og sögur alveg frá upphafi – frá því ég sendi frá mér fyrstu ljóðabókina 15 ára. … Ef ég nota ekki drauma beinlínis, þá styðst ég við tungumál draumsins.1
Rifjaðu upp eitthvað sem þig dreymdi nýlega. Skrifaðu sögu byggða á draumnum. Reyndu að gera hana trúverðuga þó að draumurinn hafi ef til vill verið undarlegur. Leggðu áherslu á smáatriði og leitastu við að skapa raunverulegar persónur. Hvað sem öðru líður, ekki ljóstra því upp að þetta hafi verið draumur.
Flettu dagblaðinu sem kom inn um lúguna í morgun eða skrollaðu niður fréttasíðu að eigin vali. Leitaðu að frétt sem mætti nota sem efni í sögu. Byrjaðu á því að punkta hjá þér hvaða persónur koma við sögu og veltu fyrir þér hver þeirra ætti að vera í aðalhlutverki. Í hverju felast átökin í sögunni? Kemur það fram í fréttinni eða er það einmitt undanskilið? Hér eiga persónurnar að vera í forgrunni frásagnarinnar.
Skrifaðu í 5 mínútur um allt sem kemur upp í hugann. Hafðu í huga að textinn sem þú skrifar er eingöngu ætlaður þér.
Þú getur gert þessa æfingu á pappír, í síma eða með því að nýta The Most Dangerous Writing App[1] en þá má ekki stoppa mikið því þá eyðist textinn