Upptaka

Taktu upp raunverulegt samtal á símann þinn. Það gerir ekkert til þótt fleiri en tveir taki þátt í samtalinu eða hvort þú ert með í samræðunum eða ekki. Næst skaltu gera tilraun til að skrifa það niður orð fyrir orð. Ekki gleyma hikorðunum og hljóðunum sem fólkið gefur frá sér.
- Lestu samtalið yfir með þessar spurningar í huga:
  - Hvað af þessu gengur upp í rituðu máli?
  - Hvað er áhugavert í samtalinu?
  - Er það innihaldsríkt?
  - Eru aðstæðurnar áhugaverðar?
  - Eru persónurnar sérstakar?
  - Er málfarið áhugavert? Eru slangur og slettur áberandi? Koma fram ólíkar mállýskur?
  - Talar einhver í hálfkveðnum vísum? Vekur sá hinn sami forvitni lesanda?
  - Er samtalið fyndið?
Endurskrifaðu samtalið með því að stroka út allan óþarfa. Haltu því eftir sem er áhugavert. Ef eitthvað er óljóst skaltu skerpa á merkingunni. Ef það á við skaltu bæta við hvernig eitthvað var sagt eða hvað átti sér stað á meðan.
Lestu samtalið upphátt eða fáðu einhvern til að lesa það fyrir þig. Þá heyrir þú hvort samtalið sé eðlilegt eða ekki; hvort orðalagið sé klaufalegt, setningar of langar eða jafnvel of flóknar. Auk þess getur samtalið hljómað skringilega ef rímorð slæðast með eða þegar stuðlun kemur fram í máli einhvers. Lagfærðu textann ef þarf.



Að skrifa áhugavert samtal sem er byggt á raunverulegum samræðum.